- {{todayDate | date: 'EEE, MMM dd, yyyy'}}
www.vyaapaarsamachar.com
મુંબઇઃ ભારતની મધ્યસ્થ બેન્કે RBIએ વિદેશી ધિરાણકર્તા અને ફાઇનાન્સિયલ સર્વિસ આપતી ડ્યૂશ બેન્ક એજીને 2 કરોડ રૂપિયાનો જંગી દંડ ફટકાર્યો છે. થાપણ સંબંધિત નિયમોનું ઉલ્લંઘન કરવાના આરોપમાં RBIએ ડ્યૂશ બેન્કને આટલો તોતિંગ દંડ ફટકાર્યો છે. RBIએ 12મી જાન્યુઆરી, 2021ના રોજ એક આદેશ જારી કરતા કહ્યુ કે, ડ્યૂશ બેન્કે એજી પર 2 કરોડ રૂપિયાનો નાણાંકીય દંડ કરવામાં આવ્યો છે. આ દંડ બેન્કિંગ રેગ્યુલેશન એક્ટ-1949ના સેક્શન46(4)(i)માં રહેલી કલમ 47 A (1) (c)ની જોગવાઇઓ હેઠલ ફટકરાવામાં આવ્યો છે. આ કાર્યવાહી નિયમોના પાલનમાં ઉલ્લંઘન અને ખામીઓને પગલે કરવામાં આવી છે.
ડ્યૂશ બેન્કને આ અગાઉ RBI તરફથી એક નોટિસ મોકલવામાં આવી હતી, જેમાં જણાવ્યુ હતુ કે, RBIના નિર્દેશોનું પાલન ન કરવા બદલ તેને શા માટે દંડ ન કરવો જોઇએ. બેન્ક તરફથી મોકલેલ જવાબમાં પુરતો સંતોષ ન થતા RBIએ નિયમોનું પાલન ન કરવાના આરોપમાં દોષી જણાતા આ દંડ કરવામાં આવ્યો છે.
હકીકતમાં, 31 માર્ચ 2019ના રોજ ડ્યૂશ બેન્ક એજીની નાણાંકીય સ્થિતિ અને જોખમ આંકલન રિપોર્ટ જોતા બાદ એ જાણવા મળ્યુ કે બેન્ક દ્વારા RBIની થાપણ પર વ્યાજદરના નિર્દેશ 2016નું પાલન કર્યુ નથી. ત્યારબાદ RBIએ ડ્યૂશ બેન્કને નોટિસ બજાવી હતી.
RBIએ 2016માં ડ્યૂશ બેન્ક અને સ્ટાન્ડર્ડ ચાર્ટર્ડ બેન્ક સહિત પાંચ વિદેશી બેન્કોને દંડ ફટકાર્યો હતો. આ બેન્કો પર આ દંડ ફોરેન એક્સચેન્જ મેનેજમેન્ટ એક્ટ (FEMA) સબંધિત નિયમોના ઉલ્લંઘન બદલ કર્યો હતો. ત્યારે ડ્યૂશ બેન્કને 20 હજાર રૂપિયાનો દંડ કરવામાં આવ્યો છે. ડ્યૂશ બેન્ક એજી એક ઇન્ટરનેશનલ બેન્ક છે જેનું હેડક્વાર્ટર ફ્રેન્કફર્ટ, જર્મનીમાં છે, બેન્કની પાસે 72 દેશોમાં 80 હજારથી પણ વધારે કર્મચારીઓ છે.