- {{todayDate | date: 'EEE, MMM dd, yyyy'}}
vyaapaarsamachar.com
અમદાવાદ : ડોલરની મજબૂતી અને અન્ય કારણોસર દેશના વિદેશી હૂંડિયામણ અનામતમાં 31મી ડિસેમ્બર, 2021ના સપ્તાહે ભારતના વિદેશી હૂંડિયામણ અનામતમાં 1.466 અબજ ડોલરનો ઘટાડો જોવા મળ્યો છે. સતત છઠ્ઠા સપ્તાહે ફોરેક્સ રિઝર્વ ઘટીને 633.614 અબજ ડોલર થઈ છે.
શુક્રવારે રિઝર્વ બેંક ઓફ ઈન્ડિયા દ્વારા જાહેર કરવામાં આવેલા આંકડા અનુસાર 24 ડિસેમ્બરના રોજ પૂરા થયેલા સપ્તાહમાં ફોરેક્સ રિઝર્વ 58.7 કરોડ ડોલર ઘટીને 635.08 અબજ ડોલર થયું હતું. અત્રે ઉલ્લેખનીય છે કે 3 સપ્ટેમ્બર, 2021ના રોજ પૂરા થયેલા સપ્તાહમાં વિદેશી હૂંડિયામણ અનામત 642.453 અબજ ડોલરની રેકોર્ડ ઉચ્ચતમ સપાટીએ પહોંચ્યું હતું.
આરબીઆઈના સાપ્તાહિક ડેટા અનુસાર 31 ડિસેમ્બરે પૂરા થયેલા રિપોર્ટિંગ સપ્તાહમાં વિદેશી મુદ્રા ભંડારમાં ઘટાડો થવાનું કારણ વિદેશી ચલણ અસ્કયામતો (FCA)માં ઘટાડો છે, જે કુલ અનામતનો નોંધપાત્ર હિસ્સો ધરાવે છે. આરબીઆઈના ડેટા અનુસાર સપ્તાહ દરમિયાન એફસીએ 1.48 અબજ ડોલર ઘટીને 569.889 અબજ ડોલર થયા છે.
ફોરેન કરન્સી એસેટ, જે કુલ રીઝર્વમાં નોંધપાત્ર ભાગ ધરાવે છે. ડોલર સિવાયની અન્ય કરન્સી જેવી કે યુરો, પાઉન્ડ અને યેન જેવી ગ્લોબલ કરન્સીના ડોલરની સામેના ઘસારાની અસર પણ એફસીએ પર પડે છે.
આ સપ્તાહે સોનાના ભંડારનું મૂલ્ય 1.4 કરોડ ડોલર વધીને 39.405 અબજ ડોલર થયું હતું. ઇન્ટરનેશનલ મોનેટરી ફંડ (IMF) પાસે રહેલ સ્પેશ્યલ ડ્રોઇંગ રાઇટ્સ સમીક્ષા હેઠળના સપ્તાહમાં 19.114 અબજ ડોલર પર યથાવત રહ્યા હતા. ઈન્ટરનેશનલ મોનેટરી ફંડ પાસે રહેલ રિઝર્વ પણ 5.207 અબજ ડોલર પર યથાવત છે.