- {{todayDate | date: 'EEE, MMM dd, yyyy'}}
vyaapaarsamachar.com
અમદાવાદ : આંતરરાષ્ટ્રીય બજારમાં ક્રૂડ ઓઇલનો ભાવ વધીને પ્રતિ બેરલ ૮૭ ડોલરને પાર થઇ ગયો છે. ક્રૂડનો આ ભાવ ૨૦૧૪ પછીનો સૌૈથી ઉંચો ભાવ છે. ક્રૂડના ભાવ આટલા વધ્યા હોવા છતાં પેટ્રોલ અને ડીઝલના ભાવ વધારવામાં આવ્યા નથી. છેલ્લા ૭૪ દિવસથી પેટ્રોલ અને ડીઝલના ભાવમાં કોઇ ફેરફાર કરવામાં આવ્યો નથી.
સૂત્રોના જણાવ્યા અનુસાર પાંચ રાજ્યોની વિધાનસભા ચૂંટણીને પગલે ક્રૂડના ભાવ વધવા છતાં પેટ્રોલ અને ડીઝલના ભાવ વધારવામાં આવી રહ્યાં નથી. ચૂંટણી પૂર્ણ થતા જ પેટ્રોલ અને ડીઝલના ભાવમાં તોતિંગ વધારો ઝીંકવામાં આવશે તેવી શક્યતા છે.
યમનના હૂતી બળવાખોરો દ્વારા યુએઇમાં ઓઇલ ફેસિલિટી પર હુમલો કરતા જીયોપોલિટિકલ તંગદિલી વધતા ક્રૂડનો ભાવ વધીને પ્રતિ બેરલ ૮૭.૭ ડોેલર થઇ ગયો છે. સૂત્રોના જણાવ્યા અનુસાર ગઇકાલના હુમલાને કારણે સઉદી અરેબિયા અને ઇરાન વચ્ચેની તંગદિલી વધશે.
દેશમાં પેટ્રોલ અને ડીઝલના ભાવ આંતરરાષ્ટ્રીય બજારમાં ક્રૂડના ભાવને આધારે નક્કી થાય છે પણ લગભગ બે મહિનાથી પેટ્રોલ અને ડીઝલના ભાવમાં કોઇ ફેરફાર કરવામાં આવ્યો નથી.
હાલમાં દેશની રાજધાની દિલ્હીમાં એક લિટર પેટ્રોલનો ભાવ ૯૫.૪૧ રૃપિયા અને એક લિટર ડીઝલનો ભાવ ૮૬.૬૭ રૃપિયા છે.
ઉલ્લેખનીય છે કે પાંચ રાજ્યો ઉત્તર પ્રદેશ, પંજાબ, ગોવા, ઉત્તરાખંડ અને મણિપુરમાં ૧૦ ફેબુ્રઆરીથી સાત માર્ચ સુધી વિવિધ તબક્કાઓંમાં વિધાનસભા ચૂંટણી છે. ૧૦ માર્ચે એક સાથે પાંચ રાજ્યોની મતગણતરી હાથ ધરવામાં આવશે.