- {{todayDate | date: 'EEE, MMM dd, yyyy'}}
vyaapaarsamachar.com
ગ્વાલિયર: દેશની અનેક કોર્ટમાં અજબ-ગજબ કિસ્સાઓ આવતા હોય છે અને ક્યારેક સુનાવણીની દ્રષ્ટીએ પણ તે અનોખો કિસ્સાઓ પ્રકાશમાં આવતા હોય છે જેમાંથી એક ગ્વાલિયરમાં બનેલ કોર્ટ કેસ છે. મધ્યપ્રદેશના ગ્વાલિયરમાં માત્ર 20 રૂપિયાની ચોરીનો કેસ 41 વર્ષ ચાલ્યાનો અનોખો મામલો સામે આવ્યો છે. આખરે 41 વર્ષે કેસનો અંત આવ્યો છે.
હકીકતમાં આખો કેસ 1978નો છે, જ્યારે માધોગંજ ક્ષેત્રમાં ઇસ્માઇલ ખાને બાબુલાલનાં ખીસ્સામાંથી બસની ટિકિટની લાઇનમાં રહેલા 20 રૂપિયા કાઢી લીધા હતા. આ દરમિયાન બાબુલાલે પોલીસ સ્ટેશનમાં કેસ દાખલ કર્યો હતો. તપાસ બાદ ફરિયાદ કોર્ટમાં રજૂ કરવામાં આવી હતી. આ કેસ કોર્ટમાં ચાલી રહ્યો હતો. ન્યાયીક મેજીસ્ટ્રેટને ત્યાં સુનવણી ચાલી અને ઇસ્માઇલે કોર્ટમાં આવવાનું બંધ કરી દીધું. જ્યારે તેઓ કોર્ટ ન આવ્યા તો વર્ષ 2004માં કોર્ટે ઇસ્માઇલ ખાનની ધરપકડનુ વોરન્ટ ઇશ્યું કર્યું હતું.
પોલીસે 15 વર્ષ બાદ ઇસ્માઇલ ખાનને શોધી કાઢ્યો અને તેને જેલ મોકલી દીધો અને તેને ચાર મહિના જેલમાં રહેવું પડ્યું હતું. ન્યાયાલયના અધિકારીના અનુસાર આ કિસ્સો શનિવારે રાષ્ટ્રીય લોક અદાલતમાં પહોંચ્યો હતો, જ્યાં પ્રથમ શ્રેણી મેજીસ્ટ્રેટ અનિલ કુમાર નામદેવની સલાહ પર આ મુદ્દાનો ઉકેલ લાવ્યા હતા. કોર્ટે બાબુલાલને કહ્યું કે, કેસ 41 વર્ષ જુનો છે. આરોપી પણ ચાર મહિના જેલમાં રહી ચુક્યો છે. આ કેસને ચલાવવાનો કોઇ જ અર્થ નથી. સુનવણી દરમિયાન ફરિયાદી બાબુલાલ (64)એ કહ્યું કે, સાહેબ હું આરોપીને નથી ઓળખતો. આટલા વર્ષો વિતિ ગયા. હવે કેસ ખતમ કરી દો. ત્યાર બાદ ફરિયાદીની સંમતીથી જ કેસ ખતમ કરી દેવામાં આવ્યો.